Då har me omsider komme fram til New Zealand. Det er ganske surrealistisk at me har segla så langt denne sesongen. No har triptellaren runda 8600 nautiske mil sidan me kjøpte båten. Ganske respektabelt synest me.
Det var kaldt, vått og surt då me segla inn i Bay of Islands. Nesten som å kome heim med andre ord. Heldigvis er det varmeovn ombord, så me fekk varmen i oss ganske fort. Insjekk har gått fint, dei måtte gasse båten vår for insekt, noko me synest er heilt greitt. Blindpassasjerane har vore ombord lenge nok.
Turen ned var, sett i ettertid, ikkje så værst. Det byrja dårleg med sterk vind og store bølger ut frå Fiji, der me mista ei dieselkanne overbord. To dagar med sterk motvind og store bølger midtvegs, der me bevega oss 50 nautiske mot mål på 48 timar. Det gjorde oss litt motlause. . Etter det var det tilnærma vindstille i fem dagar, men med motor så køyrde me mot mål i det minste. Me har køyrt fleire timar med motor på denne overfarten enn frå Mexico til Fiji! Slutten av turen var meir segling, og me kom fram til Opua i grevens tid med kuling i ryggen.
Me kryssa 15 breddegrader frå Fiji til Opua, noko me merka godt på temperaturen. Det gjekk frå knapt shorts til stilongs og solide seglklede. Natta vart også kald og me måtte pakke oss godt inn i fleecepledd for å halde varmen. Merkar at det er ei stund sidan me har vore i «kulda».
Det vart fiska på denne overfarten og. Me fekk ganske fort ein fin Mahi Mahi som gav måltid for tre- fire dagar. Fisketaco var på menyem og smakte himmelsk. Etter fyrste fisken fann Tina ut at ho ville få opp neste fisk sidan det til no berre har vore eg som har hatt den gleda. Som sagt så gjort, neste fisk som beit på var Tina sin. Det skreik godt i snella og Tina tok opp kampen, etter gode 15 minutt hadde SuperTina fått fisken inn til båten, og eg kleppa med stø hand. Og for ein fisk! Big Eye tuna på omlag 25 kg. Ikkje værst som fyrste sydhavsfisk.
Det vart Sushi i lange baner, og det vert nok fisk på menyen i nokre dagar til. Her i Opua skal me få besøk av Monica, ei god segleveninne av Tina, som tilfeldigvis er i New Zealand no. Me skal segle rundt i Bay of Islands i nokre dagar, det ser me fram til.
Avlutningsvis er nokre bilder av soloppgangar frå turen
S/V Freya 